Vieiros

As batallas, as conspiracións, os festexos triunfais ao carón do Castelo de Monterrei ou os berros de "Morte aos malfeitores!"... terán que agardar até o 2010. O futuro do Reino de Galiza non se decidirá este ano nunha revolta social tecida ao calor do mes de setembro, senón que terá que agardar até a vindeira primavera. Dende a Dirección Xeral de Xuventude e Voluntariado anuncian a decisión de pospoñer o xogo de rol en vivo "Irmandiños: a Revolta", polo que piden desculpas a todos os participantes.

Nun comunicado explican que "os informes dos funcionarios do departamento económico-financeiro non deixan outra alternativa" e subliñan o custe que esta actividade tivo o ano pasado, un total de 163.097 euros. Así, agradecen a boa disposición da entidade que impulsa a iniciativa, 13Negativo, a quen lle solicitaron unha rebaixa no prezo do programa: "indicaron que resulta posíbel reducir considerabelmente os gastos suprimindo todos aqueles elementos que non sexan imprescindibles para a súa organización".

Se ben aínda non hai unha data fixada para a celebración deste gran xogo de rol, no que o ano pasado participaron uns 800 mozos, dende a Consellaría de Traballo, da que depende Xuventude, adiantan que xa se está a traballar no seu programa. Así, explican que están a preparar "un xogo máis potente, máis ambicioso", que contará con financiamento europeo e local "implicando activamente á mocidade portuguesa, ó Eixo Atlántico e ás vilas de Verín, Chaves e Monterrei".

Defínese deste xeito o futuro deste gran xogo, emblema da política nacionalista no goberno, e que estaba no aire. Nos pasados meses, tanto o BNG como Xuventudes Socialistas pedían ao goberno que mantivesen a convocatoria, que valoraban moi positivamente como medio para achegarse de xeito lúdico á historia de Galiza.