Vieiros

O Leite Río Breogán xoga este venres ás nove da noite o segundo partido da súa eliminatoria de ascenso á liga ACB, contra os andaluces do Los Barrios. O encontro disputarase ás nove da noite no pavillón Samuel Aguilar, e os gaditanos permitirán a entrada libre dos seus seareiros para axudar así a crear un ambiente que axude aos seus xogadores. Os lugueses chegan a España coa vitoria como única hipótese se queren seguir na loita polo ascenso, despois de perder o martes no Pazo dos Deportes o factor campo.

O equipo que adestra Sergio Valdeomillos chega coa baixa segura de Bill Phillips e as posíbeis ausencias de Spencer Gloger e Daniel Clarck. Aínda así, tratarán de gañar nun campo difícil, onde ninguén o consigue dende o pasado mes de outubro. A solidez defensiva e constancia como grupo son as principais virtudes do primeiro obstáculo que terán os lugueses na súa loita polo ascenso. No caso de gañar os galegos este partido habería un terceiro encontro en Lugo, e o vencedor pasaría a unha final a catro equipos, que se resolverá polo sistema de semifinais e final a un só partido.

O adestrador do Breogán, Sergio Valdeomillos fai unha lectura positiva deste enfrontamento ao límite: "o equipo debe dar un paso adiante e demostrar que pode superar unha situación así. Aquí o que vale é o todo ou nada, e perder sería o mesmo que facelo na final a catro, porque para nós só hai un obxectivo". Valdeomillos tamén fixo unha reflexión sobre o futuro das eliminatorias, cunha idea que pretende traspasar aos seus xogadores: "normalmente ascende o que menos erros comete, non o que xoga mellor".