Vieiros

Cando aínda faltaban dúas xornadas para rematar a liga portuguesa, o F.C. Porto proclamouse matematicamente campión grazas á súa vitoria por un gol a cero fronte ao Nacional da Madeira. O defensa central Bruno Alves foi o heroe da noite no estadio do Dragão ao marcar cun remate de cabeza o gol da vitoria. O equipo que dirixe Jesualdo Ferreira gaña o seu cuarto título consecutivo, o terceiro baixo o mandato do adestrador de Mirandela.

Con este título o F.C. Porto suma 23 ligas portuguesas, colocándose cinco títulos por enriba do Sporting de Lisboa (18) e outros tantos por debaixo do Benfica (28). O campionato desta tempada 2008/2009 non foi tan cómodo para os portistas como os de algúns anos anteriores, e non chegaron ao liderado até a última xornada da primeira volta. Se cadra o motivo foi o período de aclimatación vivido por fichaxes que rematarían tendo un papel importante no equipo como Hulk, Cristian Rodríguez ou Cissokho.

Na segunda posición, como os últimos catro anos, ficou o Sporting de Lisboa adestrado por Paulo Bento e liderado no campo por Jõao Moutinho. A gran decepción foi o Benfica adestrado polo español Quique Sánchez Flores que confeccionou un equipo destinado a loitar pola liga e, con dúas xornadas por diante, opta só a consolidar a terceira posición que ocupa actualmente. Por abaixo, Beleneses, Trofense, Vitoria de Setúbal, Río Ave e Naval loitan por manterse na categoría.