Vieiros

O conselleiro de Presidencia, Afonso Rueda, anunciou este martes que a Xunta iniciou as "xestións oportunas" para tramitar as comparecencias no Parlamento dos dez novos conselleiros do Goberno, que, deste modo, informarán a petición propia sobre os "obxectivos e liñas xerais de actuación política" dos departamentos que dirixen.

Desta forma, o propio Rueda comparecerá a petición propia no Pleno da Cámara para tratar as "liñas estratéxicas" da Consellaría de Presidencia, Administracións Públicas e Xustiza. Mentres, Marta Fernández Currás fará o propio como titular de Facenda; Agustín Hernández exporá os obxectivos da Consellaría de Medio Ambiente, Territorio e Infraestruturas; e Pilar Farjas Abadía repasará os obxectivos da Consellaría de Sanidade.

Pola súa banda, Xavier Guerra acudirá ao hemiciclo para expoñer as liñas estratéxicas da Consellaría de Economía e Industria; Xesús Vázquez tratará a actuación política do departamento de Educación e Ordenación Universitaria; Roberto Varela informará dos retos da Cultura e Turismo; Beatriz Mato dará conta da actuación política a realizar na área de Traballo e Benestar; Samuel Juárez, explicará os principais proxectos de Medio Rural; e Rosa Quintana fará o mesmo respecto á Consellaría do Mar.

Este anuncio prodúcese o mesmo día en que o PSdeG presentou no rexistro do Parlamento galego a solicitude de comparecencia dos 10 novos conselleiros para que expliquen as súas "liñas de actuación" en cada departamento, ao tempo que advertiu de que "non tolerará a volta aos tempos do escurantismo".