Vieiros

Un proxecto da organización humanitaria Save the Children permitiulle a un grupo de nenos e nenas iraquís refuxiados no Líbano expresar as súas opinións sobre diversos temas a través dunha serie de curtas de animación realizadas na súa maior parte por eles mesmos.

As crianzas falan sobre cuestións como a discriminación, a violencia, os malos tratos nas escolas e do que senten sendo refuxiados noutro país. "As obras representan un claro exemplo de como un proxecto pode ser á vez educativo e animar á participación; demóstrase que involucrando os nenos neste tipo de proxectos se poden xerar mensaxes de presión con moito poder", sinalan dende a ONG.

O taller de creación fai parte do Proxecto de Apoio Educativo aos Nenos Refuxiados Iraquís no Líbano, dirixido por Save the Children Suecia e financiado pola Axencia de Cooperación Internacional deste mesmo país. Como protexérmosnos fronte á discriminación, Queremos regresar ao Iraq ou Paremos a violencia contra os nenos son algúns dos títulos das producións.