Vieiros

O nomeamento do ex-ministro de Economía de Hungría, Gordon Bajnai, como primeiro ministro foi recibido con importantes manifestacións en Budapest. A elección de Bajnai como subsituto de Ferenc Gyurcsány foi aprobada cos votos a favor dos socialistas e dos liberais e a ausencia dos conservaDores nunha moción de censura construtiva proposta polo Partido Socialista. Deste xeito, esquivouse a convocatoria de eleccións lexislativas anticipadas que reclamaba a oposición, favorita en todas as sondaxes.

Os enfrontamentos producidos no centro da capital húngara entre as forzas da orde e grupos de manifestantes saldáronse con, cando menos, 11 civís e 19 axentes feridos leves, máis outras 13 persoas detidas. A mobilización pacífica de cinco mil persoas acabou derivando en violencia o martes á noite despois de que varios representantes da organización radical Garda Húngara se enfrontasen coa policía.

A manifestación fora convocada contra o nomeamento do novo primeiro ministro e esixindo eleccións anticipadas. Cando o parlamento votou a favor de Bajnai, a maioría das persoas abandonaron a praza do edificio do Lexislativo de Hungría, pero uns 500 manifestantes permaneceron no lugar e tentaron derrubar os cordóns policiais. Por mor disto, os axentes tentáronos dispersar con gases lacrimóxenos.