Vieiros

"Para que os seus dereitos non dependan da vontade dun ou outro goberno", afirmou o presidente da Xunta e secretario xeral do PSdeG, Emilio Pérez Touriño, durante unha visita ao Fogar Español de Montevideo. Así se refería o líder dos socialistas á necesidade de que as políticas sociais que actualmente se estenden aos residentes ausentes "queden definitivamente consolidadas". Foi así como se comprometeu a impulsar unha Lei de Galeguidade que permitirá "consolidar" os dereitos dos emigrantes e dos seus descendentes mediante unha norma "con rango de lei".

Ao respecto do mesmo asunto, asegurou que o novo Estatuto, subliñando que se trata dunha reforma prioritaria para a próxima lexislatura, contará cun capítulo dedicado á emigración e á súa "decisiva contribución" a Galiza. "Deixará sentado o compromiso da Galiza territorial coa Galiza exterior", explicou. De paso, apelou á "participación" e "mobilización" dos galegos da diáspora, coa fin de que "fagan oír a súa voz". "Quero contar con todos, porque a unión fai a forza", dixo, definindo os galegos do exterior de "forza vital e decisiva".

Ao fío, lamentou "que se poñan condicións ao exercicio dun dereito recollido na lei", referíndose á norma que a Xunta Electoral Central (XEC) ditou para obrigar a que os residentes ausentes a achegar unha copia do DI ou o pasaporte co seu voto. E na mesma liña, en resposta aos xornalistas, felicitou que os consulados vaian expedir pasaportes provisionais gratuítos que sirvan aos emigrantes para exercer o seu dereito ao sufraxio. "Todo o que permita, facilite e amplíe dereitos é positivo nunha democracia", comentou Touriño. "Parece que lle teñen medo ao exercicio do dereito a voto dos cidadáns e, particularmente, dos emigrantes", sentenciou.

Plan para a Formación Profesional
Por outro lado, Pérez Touriño tamén anunciou a posta en marcha dun plan de formación profesional dotado con 700 millóns de euros que, ao seu xuízo, "actuará como panca" para a incorporación dos mozos ao mercado de traballo. Nun vídeo difundido na rede, Touriño explicou que esta actuación incrementará "nun 50%" o número de persoas que accedan á formación profesional (FP). Indicou que esta iniciativa permitirá que o 90% das persoas que fagan FP nun período de seis meses, "se atopen en condicións de dar cun posto de traballo" relacionado cos seus estudios e coa demanda do tecido produtivo do país.