Vieiros

É unha das novidades achegadas este venres ao tempo que se presentou a web electoral oficial das eleccións 2009 en Galiza. Mediante o envío dun SMS durante a xornada electoral, os cidadáns que o desexen poderán recibir no seu móbil avances do reconto provisional dos votos durante a noite do próximo 1 de marzo. O SMS conterá a porcentaxe de escrutinio, a porcentaxe de abstención e o número de cargos obtidos por cada candidatura.

O sitio posto en marcha esta semana pola Consellaría de Presidencia, Administracións Públicas e Xustiza inclúe información práctica para os electores, datos sobre o proceso electoral, resultados anteriores e calendario do proceso. No apartado de Información ao elector inclúense datos sobre a acreditación do dereito a voto, os métodos de votación: presencial, por correo, accesíbel, do electorado temporalmente no estranxeiro, dos inscritos no censo especial de residentes ausentes no estranxeiro, do persoal embarcado ou en situacións excepcionais e dos electores en penitenciarías, as mesas e locais.