Vieiros

A volta do executivo conservador de Silvio Berlusconi ao poder en Italia volve ofrecer no escenario televisivo revirados episodios de censura, como xa acontecera en etapas anteriores. A última aconteceu este mesmo martes cando a Rai Due emitía en horario nocturno e desde as 22h45 o filme estadounidense Brokeback Mountain.

Os televidentes que coñecían a película de antemán, viron con sorpresa como a premiada historia de amor entre dous homes interpretada por Heath Ledger e Jake Gyllenhaal foi emitida con cortes na canle pública italiana. Así, dúas escenas referidas respectivamente a un bico entre os protagonistas e á súa primeira relación sexual, foron eliminadas da cinta.

Diversos colectivos sociais italianos critican este mércores a censura practicada pola dirección da canle con este filme e piden que se volva emitir integramente e sen recortes. "O servizo público de televisión non pode de ningún xeito apoiar a crecente homofobia neste país", laiouse Aurelio Mancuso, da asociación Arcigay. "Quixeron transformar un delicado filme de amor nunha película familiar", ironizan para a axencia Ansa desde outro colectivo en defensa dos dereitos dos homosexuais.

No ensino: recortes para o público e privilexio para o privado
No marco das acusacións ao goberno Berlusconi pola súa proximidade cos sectores máis reaccionarios do país, está de actualidade tamén a polémica polas axudas económicas ás escolas.

O goberno italiano reaccionou recentemente fronte ás presións do Vaticano e introduciu unha emenda que correxía unha emenda anterior. O motivo: manter as axudas para as escolas privadas do país, moitas delas católicas. En apenas unhas horas, e cunha velada ameaza polo medio lanzada polo director da Conferencia Episcopal Italiana, o executivo aceptou a concesión aos colexios católicos. Dese xeito, mantéñense os recortes para as escolas públicas, que non lle afectarán ás privadas.