Vieiros

O Extrugasa buscará na FIBA Eurocup a primeira vitoria do ano no seu feudo. As xogadoras de Isaac Fernández reciben ás sicilianas do Pallancanastro Ribera, a partir das 20.30 horas no pavillón municipal de Fontecarmoa. No grupo das arousás están tamén o Tarbes Gespe Bigorre francés, e o Olivais de Coimbra portugués.

O equipo que adestra Isaac Fernández chega á estrea europea despois de sufrir a súa segunda derrota na liga, o pasado sábado, ante o Ebe Ibiza. Malia os malos resultados na casa, Fernández afirmou que "é bo que a xente poida vernos xogar nestas competicións, e se pode ser gañando, mellor".

Para o adestrador do Extrugasa, o obxectivo na FIBA Eurocup é "competir ben e dar o máximo para chegar o máis adiante posíbel". Fernández ve ás xogadoras francesas como claras favoritas do grupo, mentres o seu equipo debería loitar coas xogadoras do Pallancanastro pola clasificación para a seguinte rolda.

O principal problema co que se atopa o equipo arousán é a inexperiencia, xa que Isaac Fernández adestra un colectivo que non chega aos 24 anos de idade media. Ademais, o grupo rexistrou multitude de mudanzas con respecto ao cadro que o ano pasado chegou até os oitavos de final, nesta mesma competición.