Vieiros

Un dos problemas máis salientábeis que sofren os nosos ríos é a gran cantidade de lixo que aparece nos seus leitos e ribeiras. Para tratar de minimizar esta situación, uns 240 grupos de voluntarios analizarán este sábado o estado no que se atopan a meirande parte dos regos fluviais do país, nunha campaña que organiza a Asociación Ecoloxista de Galiza (Adega). Trátase dunha limpeza simultánea en 22 concellos para a que se establecerá un protocolo de actuación, de xeito que o traballo se faga de forma ecolóxica e respectuosa cos ecosistemas. Especial atención prestarase ao perigo das especies foráneas nos ecosistemas galegos que, segundo os ecoloxistas, son a segunda causa principal da perda da biodiversidade no planeta.

Informe anual
Dende o Proxecto Ríos márcanse o obxectivo de concienciar á sociedade da necesidade de mantelos limpos, como premisa para a conservación da súa saúde. Con todo, a limpeza non pretende ser unha actividade illada, dun só día. Pola contra, dende Adega alertan de que cómpre desenvolver actitudes responsábeis cara o medio natural e reiteran que depende de todos frear a contaminación.

Precisamente esta iniciativa favorecerá unha recollida de datos que permita coñecer o estado dos cursos fluviais, mediante a análise de invertebrados, a fauna, a flora ou o estado químico da auga. Con toda esta información elaborarase un informe anual sobre os ríos galegos.