Vieiros

Once persoas resultaron feridas de carácter leve despois de que un coche bomba estacionado na porta de acceso da comisaría da Ertzaintza en Ondarroa (Biscaia) estourase ás 4:30 da madrugada, segundo informaron fontes do Departamento Vasco de Interior. Os feridos tiveron que ser atentidos por cortes e contusións e problemas nos oídos. Non houbo ningún aviso previo, polo que non deu tempo a evacuar a zona, que continuará acordoada toda a mañá.

Os danos materiais causados na comisaría son considerables. A fachada presenta tres grandes fendas e hai restos de coches espallados nun radio de 400 metros ao redor do centro. Ademais, hai numerosas vivendas e comercios das inmediacións e da outra beira da ría afectadas pola bomba. Entre os feridos hai tres axentes da policía autónoma vasca, mentres que os outros catro son viandantes que pasaban pola zona.

O de Ondarroa foi o segundo atentado da noite. Outro coche bomba con 82 quilos de explosivo estalaba a medianoite nos arredores de Vitoria, no novo barrio de Salburua, sen causar feridos. A explosión, de gran potencia, produciuse nunha zona non residencial, fronte á nova sede corporativa de Caixa Vital, que sufriu numerosos danos materiais pero non na súa estrutura, despois de que un comunicante que dicía falar en nome de ETA chamase á policía local ás 23.15 do sábado para avisar da colocación do artefacto.