Vieiros

O xurado do concurso de maquetas Nsaio no camiño decidiu que grupos actuarán nas cinco semifinais que, por xéneros, se celebrarán ao longo do mes de agosto por todo o país. Da peneira resultaron 15 semifinalistas.

A primeira das semifinais, a de pop, terá lugar o 8 de agosto en Tui. Supersound, Maryland e Snatch compartirán escenario con Deluxe. No apartado de mestizaxe, tocarán o 15 de agosto en Boiro os grupos Chotokoeu, Son do Galpom e Duplo Son, que precederán a actuación de Lamatumbá. Na final de novas tendencias (o 23 de agosto na Coruña) competirán Telémaco, Noise Project e Os Trasnos, precedendo a The Go Team.

Roberto Sobrado, Sínefres e Skandalo GZ foron os grupos seleccionados para a semifinal na modalidade de rock, que se celebrará o 29 de agosto en Ribadeo, con Boikot de padriño. Por último, o 29 de agosto será a final de folk, que se desenvolverá en Allariz, co directo de Taratrio, Loba loo e a Banda Folk de Ribas de Sil, que precederán a actuación de Uxía.

O gañador de cada semifinal competirá cun concerto final, do que sairá o vencedor do certame, que obterá a posibilidade de gravar un disco nun estudo de prestixio, así como un contrato discográfico e de management a nivel estatal.

O pasado ano os gañadores foron os boirenses Supersandwich. Ademais, participaron bandas da categoría de Colectivo Oruga, O Son do Galpom, Kogito, Kastoma, Guezos ou Safari Orquestra.