Vieiros

Os vintecinco barcos que integran a frota galega son protagonistas este mércores dun desfile comentado, onde milleiros de persoas poderán coñecer os detalles da diversidade do patrimonio galego vencellado ao mar e os ríos. Unha actividade que será aínda máis especial á noite, cando os barcos galegos poidan encabezar o desfile de veleiros europeos, nun espectáculo acompañado de iluminación e música ambiente que conta con especial seguimento por parte do público que asiste a esta festa.

Pero tamén haberá actividade en terra, onde Leilía impartirá unha nova lección de baile tradicional nun obradoiro diario espertou gran atención. Ademais, músicos galegos e bretóns estreitarán vencello nun concerto conxunto a celebrar no escenario principal. Finalmente, haberá no espazo galego un concerto conxunto de Leilía e Treixadura.

No Village Galice, o espazo de Galiza no corazón do evento, realizarase este mércores ás 11 da mañá o acto de presentación pública de Galiza en Brest, presidido pola conselleira de Cultura e Deporte, Ánxela Bugallo e o alcalde de Brest. De seguido terá lugar a botadura dunha dorna que se construíu durante estes días no propio espazo e á vista dos numerosos visitantes que se achegan a coñecer as particularidades da cultura marítima galega.