Vieiros

Durante a invasión de Etiopía en 1935, Alessandro Pirzio Biroli, xeneral dos Alpini, corpo de elite do Exército italiano, díxolles aos seus soldados: "Aquí non queda outra que ser ladrón, asasino e violador". Así foi, segundo recollen os documentos históricos, e así o recordan tamén os etíopes.

O embaixador de Etiopía en Italia, Grum Abay, convidado pola asociación cultural Südtiroler Schützenbund (da minoría xermanófona italiana), puido comprobar que os símbolos do réxime fascista de Benito Mussolini en lembranza da sanguinaria ocupación aínda perduran no norte do país, informa a axencia de noticias afrol News.

Os criminais da Segunda Guerra Italo-Abisinia son recordados como heroes no Tirol do Sur en forma de nomes de rúas -particularmente na capital da rexión, Bolzano- e monumentos. En Bruneck (Brunico, en italiano) hai un erixido en 1936 na 'honra' da chamada divisione Pusteria dos Alpini, que cometeu miles de asasinatos, violacións e torturas entre a poboación civil.

Oposición de grupos locais
Varios grupos locais e estatais levan loitando durante décadas para que este sexa retirado. O monumento xa foi obxecto de ataques antes de rematar a II Guerra Mundial, e dende aquelas foi parcialmente destruído en diversos ataques rexistrados en 1956, 1959, 1966 e 1979. Porén, as autoridades italianas arranxaron a desfeita en cada unha das ocasións.

"Aínda que o pobo etíope perdoou os ocupantes italianos, nunca esquecerá", sinalou Abay, que no entanto sinalou que "o pasado é o pasado". Porén, anunciou que informará ao presidente de Etiopía, Girma Woldegiorgis, -que loitou cos británicos contra os fascistas- e o primeiro ministro, Meles Zenawi.

Compensación, mais non perdón
A Corte Penal Internacional retirou os cargos por crimes de guerra -que incluían o uso probado de armas químicas- contra Italia porque cambiou de bando antes de rematar a II Guerra Mundial. O emperador derrocado Haile Selassie pronunciou en 1936 un discurso histórico ante a Liga das Nacións, queixándose da pasividade dos gobernos mundiais fronte á agresión e criticando o "refinamento da barbarie".

Selassie volveu ao trono en 1940 coa axuda dos británicos. Italia pagoulle a Etiopía 25 millóns de dólares en compensación polo ataque e mais a ocupación, mais nunca emitiu unha desculpa oficial polo masacre.

Por outra banda, o goberno italiano iniciou hai poucas datas o proceso de devolución do obelisco de Axum ao seu emprazamento orixinal, no norte de Etiopía, co traslado da primeira das tres pezas que o compoñen. O monumento de 152 toneladas, 23 metros e 1700 anos de antigüidade levaba en Roma dende 1937 cando foi alí trasladado por orde de Mussolini.