Vieiros

O 11 de xullo estará a portuguesa Mísia, pero antes pasarán polo Teatro Jofre o tango arxentino de Marcelo Mercadante e o seu Quinteto Porteño (20 de xuño), Marful (27 de xuño), a asturiana Anabel Santiago (4 de xullo). Así pois, fados, tangos, tonadas, habaneiras, sempre mirando de frente ao mar. Dise moitas veces que Ferrol vive de costas a el, sempre detrás dun muro (o do Arsenal), pero isto non é así: aí está Curuxeiras, a maltratada ría, as praias onde bate o océano. O Ciclo de Músicas Portuarias é unha mostra da puxanza que hoxe ainda teñen as músicas que cheiran a porto.

Ferrol quere, pois, reivindicar o seu carácter marítimo e mariñeiro. Non só a través dos ritmos que mexerán o Jofre, senón que mesmo levará a música á propia ría. O 5 de xullo realizarase un paseo en lancha pola ría, amenizado con música ao vivo de acordeón diatónico e zanfona: Dúo Carlos Quintá e Óscar Fernández. A lancha percorrerá os asteleiros de Astano, Arsenal militar, Base da Graña, Castelos da Palma e San Felipe, e as fortalezas de San Carlos e San Cristovo. Poderán participar aquelas persoas que merquen un abono para todos os concertos.

Todos os concertos terán un prezo entre 9 e 12 euros, agás o de Mísia, que custará entre 12 e 18. A cantante portuguesa presentará o seu último traballo, Lisboarium, un canto á capital lusa con textos dos grandes poetas portugueses sobre música de fado tradicional. O ciclo abrirao o arxentino Marcelo Mercadante, virtuoso do bandoneón, instrumento portuario por excelencia. Mercadante viva na actualidade en Barcelona, onde colabora regularmente con músicos doutras estéticas coma Serrat, Los Sabandeños, Nina ou Miguel Poveda. Co Quinteto Porteño publica no 2002 Esquina Buenos Aires, con temas propios, tango tradicional e versións de Astor Piazzolla.