Vieiros

A empresa estadounidense Sapphire Energy asegura ter atopado un xeito de converter as algas en gasolina 'verde', sen incrementar as emisións de dióxido de carbono á atmosfera. Os vexetais cultivaríanse en zonas desérticas, segundo informaron o xornal Los Angeles Times e mais a revista Forbes.

O presidente da nova compañía, Jason Pyle, asegura que o combustíbel pode entrar en produción dentro de tres anos e que é neutro para o ambiente, pois as algas absorben da atmosfera o mesmo CO₂ que despois se despide na combustión. Sen entrar en detalle na técnica empregada, Pyle asegurou que "creamos un proceso que depende da fotosíntese".

Ademais, ao contrario que outros biocarburantes, este 'cru verde' non incide nos terreos agrícolas, pois as algas cultivaranse en zonas áridas e soleadas, con auga non potábel. O novo combustíbel contén a mesma enerxía ca a gasolina de 91 octanos.

Porén, a administración de California, onde se atopa a sede da empresa, en San Diego, amosou cautela polo anuncio. O Consello de Recursos do Aire do estado afirmou que o combustíbel seguiría a producir contaminantes á parte do CO₂, aínda que lle desexou "sorte" a Sapphire Energy.