Vieiros

Por oitavo ano consecutivo, o Consello da Cultura Galega (CCG) acolle a celebración do Día da Poesía, estabelecido pola UNESCO en 2000. A conmemoración nace co fin de dar un pulo a todos os movementos poéticos e así soster a diversidade dos idiomas, facendo posible a expresión dos pobos na súa propia lingua.

Como non podía ser de outra maneira, os actos contan cun recital poético no que intervirán poetas galegos como Luz Pozo Garza, María Xosé Queizán e Gonzalo Navaza, e outros internacionais entre os que se atopan Gastâo Cruz, Antoni Marí ou Olvido García Valdés. Tamén participa o ministro de Cultura en funcións e poeta galego, César Antonio Molina.

A xornada, que comeza a partir das 19:30, tamén contará coa presencia do director xeral da Unesco, Koichiro Matsuura, que procederá á lectura dun manifesto. Para rematar o violinista da Orquestra Filharmónica de Ereván (Armenia), Kamo Petrosyan, interpretará A primavera de Vivaldi.

Continuidade e colaboración

Con motivo desta celebración os presidentes do CCG e do PEN Clube de Galiza, Ramón Villares e Luís González Tosar, asinaron un protocolo de colaboración co que se garante a continuidade desta iniciativa e de outras de tipo literario.