Vieiros

Son xa 25 anos achegando ao público xeral o pensamento crítico e utilizando a palabra como forma de resistencia. Os representantes da Aula Castelao presentaron o programa desta iniciativa que desta volta xira arredor do tema: Filosofía e Utopía. A elección desta orientación está xustificada: filosofía en conmemoración daquela primeira semana que hai xa 25 anos tratou de crear un espazo de reflexión, levar ás aulas propostas innovadoras na transmisión de coñecemento e normalizar o uso do noso idioma. E utopía, como concepto filosófico que reclama a necesidade de pensar de outro modo, diferente ao imposto pola sociedade.

Nesta ocasión, o Auditorio de Caixanova de Pontevedra acollerá do 24 ao 28 de marzo as máis destacadas figuras intelectuais no ámbito do pensamento, así como representantes de movementos sociais, músicos e actores. Como novidade, os actos complementaranse coas Ultranoites Castelao, nas que actuarán Amancio Prada e a compañía teatral Cuarta Pared, coa representación da obra Rebeldías posíbeis.

O programa das xornadas dividirase en tres apartados: Pensar a utopía; Galiza: realidade e utopía; e Eidos de utopía, que contarán coa participación de relatores como Ramón Villares, Camilo Nogueira, Francisco Ayala ou Ignacio Ramonet entre outros.

Aquí podes descargar o programa completo de actividades, dividido en actividades de mañá, tarde e noite.