Vieiros

O Parlamento de Turquía aprobou, nunha primeira votación, unha emenda á Constitución que permite que as estudantes poidan empregar o veo islámico nas universidades públicas. O sábado o Parlamento terá que referendar a decisión nunha segunda votación. En principio estaría garantida a aprobación xa que o partido islamista Partido da Xustiza e o Desenvolvemento (AKP) e o opositor MHP apoian a iniciativa.

As autoridades seculares temen que o permiso acabe minando a separación entre Estado e relixión, un dos principios fundacionais da República de Turquía. Pola contra, o primeiro ministro turco, Tayyip Erdogan, lider do AKP, asegura que a iniciativa reforza a liberdade relixiosa e individual.

Non sen o meu veo
Máis do 60% das mulleres turcas empregan o veo islámico. Dende que en 1989 se prohibiu o seu uso nas universidades, moitas familias optaron por prohibirlle ás súas fillas o acceso aos estudos superiores.