Vieiros

En Silencios que se escoitan, Regueira analiza Só o silencio me responde, unha antoloxía en galego da obra da poeta rusa Ana Akhmátova, seleccionada e traducida por Ekaterina Guerbek e Penélope Pedreira. Regueira salienta que Akhmátova "non é só unha poeta nunca traducida no noso sistema literario, senón que podemos aventurar que tamén foi escasamente lida noutras traducións" e que "a escolla dos textos da autora ten a peculiaridade de presentar unha panorámica completa da súa obra, recollendo elementos de cada un dos seus libros, sen esquecer o importante conxunto dos poemas inéditos. Con isto quere dicirse que non se aproveita a visión máis popular de Akhmátova como poeta resistente ao estalinismo, senón que tamén se dá cabida a outros aspectos menos coñecidos e igualmente importantes, que nos permiten ver outras dimensións da súa obra".