Vieiros

A partir dunha auditoría interna do Ministerio de Relacións Exteriores da Arxentina, descubriuse que houbo "abuso e laxitude" na entrega das franquías e a nacionalización dos coches, paso que posteriormente permitía obter a documentación para así vendelos no mercado interno. A manobra outorgaba grandes ganancias a quen ingresaban os autos ao país con descontos de ata 50 por cento por estar libres de aranceis e impostos, pero logo eran vendidos a prezo de mercado.

Con excepción dos embaixadores, o resto dos diplomáticos estranxeiros teñen un tope de 60 mil dólares para importar vehículos e só para uso oficial. Con todo, funcionarios de segunda liña importaban autos como Ferrari, Porsche, Lamborghini ou ata un Hummer.

Segundo se estabeleceu, tampouco se cumprían os prazos para a nacionalización, que esixen un mínimo de nove meses de posesión do vehículo e un ano de destino cumprido no país. E eran postos en venda ao pouco tempo de ser ingresados. O funcionario removido polo ministro de Exteriores, Jorge Taiana, é Jorge Matas, diplomático de carreira con rango de ministro de segunda e titular do Departamento de Franquías, Patentes e IVE, que agora está intervido. A denuncia recaeu no xulgado federal de Jorge Oyarbide.

Na mira da xustiza
O xuíz Marcelo Aguinsky investiga a diplomáticos de embaixadas de países latinoamericanos, dos Estados Unidos, Canadá, Europa, Asia, África e organismos internacionais polo suposto contrabando de autos. A lista que ten o xuíz inclúe, polo menos, unha franquía sospeitosa en mans de diplomáticos de España, dos Estados Unidos, Canadá, Cuba, Guatemala, Cuba, Chile, Bolivia, Paraguai, Ecuador, e Colombia, revelaron a medios de prensa locais fontes xudiciais.

Tamén abarca a investigación a diplomáticos de Alemaña, Italia, Grecia, Rumania, Eslovenia, Croacia, Kuwait, Congo, Filipinas, Arabia Saudí, Hungría, Tunisia, Angola, Suíza, Armenia, Francia, India, Marrocos, Taiwan, Nixeria, Corea do Sur, do Unicef, do PNUD, da Orde de Malta, entre outros.

O delito de contrabando agravado documentado ten unha pena de 2 a 8 anos de prisión. En principio, a Aduana supón que o funcionario arxentino denunciado facilitaba a documentación das franquías irregulares e que os diplomáticos estranxeiros podería ser "partícipes necesarios" do contrabando.

Preocupación diplomática
A denuncia da Aduana provocou preocupación en embaixadas estranxeiras consultadas polos xornalistas arxentinos. Ainda que a actitude do ministro Taiana víase un interese e un coidado por dirixir a denuncia cara ao funcionario arxentino denunciado, a presentación do titular da Aduana ampliou a investigación aos diplomáticos estranxeiros.

Debido a isto, o xuiz Aguinsky será "moi prudente e analizará caso por caso" antes de involucrar a un diplomático estranxeiro.

O xornal La Nación accedeu ao ditame onde figuran os embaixadores e o resto dos diplomáticos sobre os que se require información. Dos 81 diplomáticos dos que o xuíz solicitou información, 12 son bolivianos e nove, chilenos. Tamén figuran sete uruguaios, sete paraguaios, cinco nixerianos, cinco rusos, catro ecuatorianos, catro cubanos, tres españois e tres marroquís.