Vieiros

O Ano da Pataca é este que acabamos de comezar, non aquel de hai 8.000 anos, cando comezou a se consumir este tubérculo no Altiplano Andino, ou aquel ano de hai cinco séculos, cando entraba en Europa para quitarnos a fame.

Aínda que as patacas veñen de Perú, Chile, Ecuador e Bolivia, a principal zona produtora xa non está en América, senón en países asiáticos e europeos. Case o 60% das patacas do mundo veñen da China, Rusia, Polonia, EUA, a India e Ucraína, segundo datos da FAO. Galiza tamén é unha importante produtora, mais dentro do Estado Español.

O ano da pataca tócalle ser ao acabado de estrear 2008, e a idea foi proposta polos expertos en alimentación da ONU, que consideran que o consumo desta raíz carnosa hase duplicar nas dúas vindeiras décadas de tal xeito que se van poder resolver moitos dos problemas de alimentación mundiais, chegando ao nivel doutros alimentos como o arroz, o trigo ou o millo (os tres produtos básicos de alimentación no planeta).