Vieiros

Unha vez superado un 2007 do que destaca a "intensidade" normativa, cun total de 35 proxectos de lei aprobados, este ano a Xunta pretende apuntalar as apostas programáticas coas que os partidos que a integran demandaron o apoio dos cidadáns o 19 de xuño de 2005, como a defensa do territorio e do medio, o impulso social ou unha nova orientación económica.

Así, tras dar luz verde a normas como a de Protección do Litoral, nos próximos doce meses verá a luz unha das grandes promesas: as directrices de ordenación, piar da política urbanística do bipartito e do que dependerá o conxunto das medidas nesta materia, xunto ao tamén pendente plan integral para ordenar o desenvolvemento da costa.

Ámbito social e de interior
O ámbito social experimentará importantes cambios a partir da Lei de Servizos Sociais e a consolidación de medidas deseñadas dende o cambio de goberno, como a Rede de Centros de Día, que prevé un notable aumento do número de prazas, ou a posta en marcha da rede de residencias de Sogaserso, ás que se sumará o afianzamento do Sistema de Atención á Dependencia, a creación do de Apoio á Mobilidade Persoal, o 065 social, o Plan de Inclusión Social ou a lei de Acción Voluntaria e a de Xuventude.

Trátase de actuacións baixo o paraugas de Vicepresidencia, que tamén se encargará de impulsar os traspasos pendentes, un reto elemental para a Consellaría de Presidencia ante o despregamento da Policía Autonómica, que requirirá da negociación con Madrid para concretar as materias que asumirá o futuro corpo, entre as que Galiza aspira a tráfico e seguridade viaria. Ademais, o departamento regulamentará o gabinete técnico da Policía, o rexistro da local, a segunda actividade e os procedementos sancionadores.

Complementariamente, afrontará o desenvolvemento da Axencia Galega de Emerxencias e a constitución dos consorcios provinciais, a construción de dez parques de bombeiros e a aprobación do Estatuto Profesional. Á parte, o equipo de Xosé Luis Méndez Romeu prevé o decreto de autoprotección, o de indemnización en situación de catástrofe, o Plan Territorial de Protección Civil de Galicia e outro para supostos especiais, así como a informatización da xustiza e o fomento da administración electrónica nos municipios.

Pola súa banda, Educación abordará a reformulación do Plan de Financiamento do Sistema Universitario de Galicia (SUG) no seo dun grupo de traballo que, con Economía e as tres universidades, se encargará de adaptar o escenario á realidade do Espazo Europeo de Educación Superior. Adicionalmente, nos primeiros meses presentará o II Plan Galego de Formación Profesional que prepara con Traballo e continuará coas accións que viña desenvolvendo en materia de gratuidade de libros, ensino de idiomas ou apertura de centros fóra do horario escolar.

Innovación, sectores produtivos, cultura e sanidade
Mentres, a Consellaría de Innovación darálle luz verde á lei de Comercio Interior e prevé implantar a Rede de Comercio Rural de Galiza, ademais de aprobar a Lei de Turismo, que se encargará de regulamentar as accións nesta materia, o decreto de Biomasa e iniciar a construción de tres centros tecnolóxicos, incluídos o do leite e o de biomedicina.

Polo que respecta aos retos de Medio Rural, o afianzamento da política de fixación de poboación no rural iniciada a comezos desta lexislatura e a aposta pola calidade de vida dos labregos e gandeiros, mediante un Contrato de Explotación Sostible, constitúen os grandes vectores para 2008, aos que se sumarán un servizo de consello agrario, que afectará a unhas 13.000 explotacións, a plena operatividade do Banco de Terras --actuando en 25.000 hectáreas actualmente abandonadas-- e a posta en marcha definitiva do Ingacal, así como a consolidación dos pasos promovidos no ámbito forestal para lograr a valorización integral do monte.

En canto a Cultura, continuará coa preparación das unidades da Cidade da Cultura que entrarán en funcionamento en 2009: o Arquivo Nacional e a Biblioteca, e ten pendente a presentación da lei de Arquivos e da de Museos, así como a posta en marcha do Plan de Lectura e do de Artes Escénicas, a presenza de Galicia na Feira do Libro de La Habana como país invitado e a reforma do Igaem para poñer en marcha a Axencia Galega de Industrias Culturais.

Sanidade creará 705 prazas de persoal no marco do Plan de Atención Primaria e Pesca marcouse como obxectivo consolidar as iniciativas postas en marcha ao longo da lexislatura, centrándose en accións que repercutan no benestar dos traballadores do mar e a conservación dos recursos. Para iso, sacará adiante a lei de Pesca e o Plan Acuícola e iniciará a aplicación dun novo instrumento financeiro: o Fondo Europeo de Pesca, para o que espera contar co sector.

Ambiente, emprego e vivenda
A Consellaría de Medio Ambiente terá que facer fronte a medidas para paliar as consecuencias da seca e garantir o abastecemento ás áreas máis afectadas, actuacións que se verán complementadas con obras estruturais previstas para os grandes núcleos. Ademais, aprobará o Plan Director de Ordenación de Espazos Naturais, co que aspira a contar cun instrumento de ordenación real das áreas incluídas na Rede Natura 2000. Ademais, na área ambiental, 2008 suporá a construción da totalidade das 20 depuradoras previstas para solucionar o saneamento nos principais núcleos de poboación e culminará a reordenación da xestión dos residuos, mediante un plan para fomentar a reciclaxe e a concienciación social ao respecto.

Pola súa banda, o departamento de Traballo porá en marcha a totalidade dos pactos territoriais de emprego, 15, tras os catro pilotos xa promovidos, e no primeiro semestre de ano prevé o trámite parlamentario da modificación do consello Galego de Relacións Laborais, un dos compromisos establecidos no marco do Diálogo Social.

Tamén aspira a culminar os decretos que garantirán o desenvolvemento pleno da lei de Traballo en Igualdade, así como o visto bo á norma de Participación Institucional, que regulamentara a participación de axentes sociais e empresariais na consellería. Aparte, para afondar na reforma do Servizo Público de Emprego, aumentará os itinerarios personalizados aos inscritos no paro, o servizo aos demandantes de emprego e a automatización das tarefas.

Por último, o gabinete de Vivenda aspira a aprobar a nova lei de Vivenda e a executar os 12 millóns de metros cadrados de chan industrial que ten en marcha, ademais de mellorar as normas de calidade cos axentes implicados na edificación e os concellos e impulsar a porcentaxe de vivenda protexida, unha vez aprobada a norma que permite aumentala ata o 40%.