Vieiros

O simposio está coordenado por Carmen Fernández Ochoa, catedrática de Arqueoloxía da Universidade Autónoma de Madrid. Entre os expertos que intervirán na Coruña figuran Jean-Yves Empereur, arqueólogo e fundador do Centro de Estudios Alexandrinos (CEAlex), Juan Manuel Abascal da Universidade de Alicante, Pablo Latorre e Luis Caballero do CSIC de Madrid, Ángel Morillo da Complutense de Madrid, Darío Bernal, da Universidad de Cádiz, Jorge de Alarcão do Instituto de Arqueologia de Coimbra e os galegos Xosé María Bello e Juan Naveiro entre outros.

O encontro contribuirá a reafirmar dende a perspectiva académica a importancia da Torre de Hércules, como único faro romano no mundo que segue en activo e como mostra única das torres de sinalización marítima levantadas polas civilizacións da Antigüidade.

Este simposio encádrase nas actividades de promoción da candidatura da Torre de Hércules para ser declarada Patrimonio da Humanidade. Será unha das dúas candidaturas que o Estado presentará antes do 1 de febreiro á Unesco, logo de que a Consellaría de Cultura e Deporte conseguise que a Torre fose elixida por unanimidade polo Consello de Patrimonio Histórico Español. No caso de que a candidatura sexa aceptada pola Unesco, este organismo resolverá a súa inclusión a mediados de 2009.