Vieiros

A extensión do dereito á nacionalidade que recolle a lei da memoria histórica aprobada este luns no Senado, facilitará que todos os netos descendentes de exiliados do Estado español poidan participar nas convocatorias electorais.

Trátase dun episodio máis que, segundo analiza Francisco Jorquera, senador do BNG, "provocará distorsións no sistema electoral". Jorquera presentara unha emenda coa que propoía modificar unha das disposicións finais da lei, a relativa ao momento da súa entrada ao vigor, de xeito que se introducise unha excepción para o apartado relacionado co dereito ao sufraxio dos cidadáns. O senador nacionalista considera que é un exemplo máis de como PSOE e PP "coinciden en opoñérense a garantir a limpeza do voto exterior e a regulamentar en que procesos electorais poden participar os descendentes dos emigrantes".

"Estender indefinidamente a nacionalidade española aos descendentes de españois sen modificar a LOREX pode levar a unha fraude democrática", sostén Jorquera, recordando a insistencia da súa formación política na necesidade de modificar a Lei Orgánica de Réxime Electoral Xeral. Os nacionalistas láianse de que "a limpeza democrática do proceso" non está garantida e critican que "un neto de emigrantes que nunca pisou Galiza poida votar nunhas eleccións municipais".