Vieiros

Cos responsábeis da comunidade internacional enleados na negociación sobre iniciativas concretas a despregar contra o cambio climático, os ambientalistas sinalan un foco de atención clave. Segundo o informe coñecido esta semana, o cambio climático está "acelerando" a destrución do Amazonas, levando o mundo a "un punto sen retorno".

Arredor do 60% da selva amazónica pode desaparecer antes de 2030, resultado dos gases de efecto invernadoiro e da deforestación masiva. WWF avisa de que ese ritmo de destrución do que se considera que é o máis importante "pulmón" do planeta, causaría a emisión de ate 96 mil millóns de toneladas de dióxido de carbono, o equivalente aos gases de efecto invernadoiro emitidos en todo o mundo durante dous anos. A ferida de morte da Amazonía, un dos "estabilizadores" clave do clima do mundo, tería efectos na temperatura global, precipitacións e mesmo influiría nalgunha das grandes correntes oceánicas.