Vieiros

Unha web dedicada a Europa, a Eupedia, ofrécenos uns mapas do continente que se saen bastante do habitual, e que amosan a súa riqueza e diversidade cultural, idiomática, legal e mesmo xenética. Un dos máis curiosos para nós é o que marca a porcentaxe de persoas con cabelos louros, e que amosa unha Galiza, xunto a Asturias, o Bierzo e o noroeste de Portugal, con herdanza celta que contrasta co resto da Península Ibérica e, en xeral, con toda a Europa mediterránea.

De feito, a porcentaxe de xente loura galega está dentro dos parámetros da Bretaña, Irlanda, Gales, Cornualles e o norte de Escocia, aínda que se poida tratar dunha simple casualidade. No mapa onde se representa a porcentaxe de individuos con ollos de cor clara xa estamos a un nivel máis ibérico, aínda que, igualmente, semellante ao do sur de Gran Bretaña. Pero a gráfica de grupos étnicos sitúanos baixo a etiqueta de “celto-suevos”.