Vieiros

A chamada a reforzar o particular "socialismo con características chinesas", en palabras do presidente Hu Jintao, abriu o XVII Congreso do Partido Comunista da China, evento que se celebra cada cinco anos. O presidente chinés, Hu Jintao, inaugurou a cita cun extenso discurso onde deixou pegadas do plan de actuación até 2012, momento no que deixará o cargo a un novo mandatario. Desta propia cita, debera saír o nome dun secretario xeral que lle substitúa naquela altura.

"Os últimos trinta anos viron a viraxe dunha economía planificada a unha economía socialista de mercado e a mellora da vida do pobo", recolle esta semana a publicación oficial do partido, o Diario do Pobo, "nestes últimos cinco anos avanzouse abondo na reforma, apertura e construción dunha sociedade moderadamente acomodada", subliña. A publicación indica que a meta inmediata é a "adaptación do marxismo á situación chinesa para promover un desenvolvemento socioeconómico sustentábel para o pobo, polo pobo e co pobo".

Xulio Ríos, director do Instituto Galego de Análise Internacional e experto en China, expresa nun artigo recente que Hu Jintao foi clave nos últimos anos na conformación dun "novo clima no proceso chinés que deixaba atrás a etapa máis liberal, sentando as bases dun novo modelo de desenvolvemento e dun axuste colectivo e ambiental que resultan imprescindibles para asegurar a sostibilidade e a estabilidade do cambio".