Vieiros

A Atlántida, A Biblioteca da Iguana, Autopsia, Condenado a vivir, Entre bateas, Jalisco, Máis ca irmáns, Mentíndolle a vida, O tesouro, O partido, Pataghorobi, Sara e Secuestrados en Xeorxia son os telefilmes que percorrerán os teatros, auditorios, casas da cultura ou salóns de actos de máis de 60 concellos, en formato DVD, entre outubro e decembro.

A Axencia Audiovisual Galega e a consellaría de Cultura queren, deste xeito, achegar o cine ás vilas que non contan con salas comerciais, promover as producións audiovisuais galegas e contribuír a estabilizar unha programación audiovisual nos concellos do país. Ademais, a AAG xa prepara o seguinte programa, unha compilación de documentais temáticos que versarán sobre a memoria histórica, o urbanismo ou as mulleres.

Para este e vindeiros programas, a AAG dirixirase tamén a asociacións, federacións e outras entidades culturais para que poidan participar nesta rede. Cultura recomenda dispor dun espazo amplo e aparatos de reproducción audiovisual (DVD, altofalantes, canón de proxección ou pantalla) para poder participar no proxecto.

Os dereitos de autor e a programación eran unha das primeiras trabas para poderen estas pequenas vilas programar cinema. Ao estaren os dereitos xestionados, por parte de Cultura, coa TVG e coas produtoras correspondentes, o acceso é moito máis doado. Cultura, a través da Dirección Xeral de Creación e Difusión Cultural e a AAG, en colaboración co IGAEM, inicia así a primeira experiencia deste tipo na Península.