Vieiros

O vicepresidente galego, Anxo Quintana, viaxará este luns a Madrid para entrevistarse coa ministra de Administracións Públicas, Elena Salgado, no marco dun novo encontro da Comisión Bilateral Galiza-Estado. O número dous do Goberno vai expresarlle o seu malestar á representante do executivo español pola “pouca dilixencia” no traspaso de competencias á Xunta que xa puxo enriba da mesa o pasado mes de febreiro.

Quintana xa advertira o pasado mes de agosto que se están a acender as luces vermellas na relacion co Estado e puxo como prazo “setembro ou comezos de outubro” para desbloquear a situación. O vicepresidente coida que as transferencias pechadas até o de agora son escasas e quere que antes de fin de ano se materialice algún transpaso pendente como pode ser o de salvamento marítimo, a inspección de traballo, os centros de investigación do Estado con sede no noso país; ou os arquivos históricos e museos.