Vieiros

O presidente de Venezuela, Hugo Chávez, manifestou este martes en Bos Aires, pouco antes de viaxar cara a Uruguai, a transcendencia do Tratado de Seguridade Enerxética (TSE) asinado co presidente arxentino Néstor Kirchner, que vai asegurar o subministro de combustíbel ao país austral, inmerso nun duro inverno.

No mesmo senso se traballa para que nas vindeiras datas tamén Uruguai, Bolivia, Ecuador e Nicaragua se sumen a este acordo, o cal, malia estar sen formalizar, xa funciona na práctica con Cuba. Segundo Chávez, "o TSE é a resposta integradora dos países latinoamericanos aos Tratados de Libre Comercio impulsados polos EUA".

"Voracidade insaciábel" dos EUA
Ademais, o presidente venezolano criticou a "voracidade insaciábel" do país norteamericano. "Os Estados Unidos de América teñen o 5% da poboación mundial, e consumen o 20% da enerxía usada no planeta", sinalou.

"Os EUA teñen un serio problema. As súas reservas de petróleo non van durar moitos anos; gastaron as súas e as de medio mundo", dixo, e engadiu que o apetito insaciábel de combustíbel levounos en numerosas ocasións a impor a súa vontade en Latinoamérica a punta de pistola.