Vieiros

Dous anos despois da propia morte do ditador, en 1977, os veciños de Cedeira viran como lles impoñían unha escultura en homenaxe a Francisco Franco nos xardíns da localidade. Gobernaba daquela o ex alcalde conservador Leopoldo Rubido e asistira á inauguración o ex ministro franquista Fernández de la Mora, quen ademais fora nomeado fillo predilecto do Concello. Rubido, que gobernou o Concello até hai poucas semanas, non asistiu ao pleno que esta semana votou a decisión.

Non puido ser até a altura de 2007 cando o recente cambio de goberno no municipio conseguiu botar adiante unha moción, aprobada no pleno deste mércores, que estabelece a retirada de toda a simboloxía franquista de rúas e prazas. "Á fin se suprimen todo o que exaltaba a persoas e feitos que atentaron contra as institucións democráticas", felicitaba o novo rexedor, o socialista Xosé Luís Vergara, despois da aprobación. No lugar que está o monolito franquista, o novo goberno cavila colocar unhas rochas en homenaxe á "rica xeoloxía" do lugar.