Vieiros

O secretario xeral das Nacións Unidas, Ban Ki Moon, advertiu na quinta feira que non vai tolerar calquera tento, por parte da 'Comisión da Verdade e a Amizade', de propor unha amnistía aos culpábeis de casos de xenocidio, crimes contra a Humanidade, crimes de guerra ou violacións flagrantes dos Dereitos Humanos cometidos en Timor Leste.

Nun seu comunicado, a voceira do organismo, Maria Okabe, dixo que o secretario xeral se opón a que os seus colaboradores, membros da antiga misión da ONU en Timor Leste, a UNAMET, testemuñen na Comisión da verdade, ante a posibilidade de que se chegue a amnistiar aos culpábeis do xenocidio do pobo timorense.

Que esta Comisión, establecida polos actuais Gobernos de Timor Leste e Indonesia, recomende a amnistía, sen excluír os crimes nin as violacións ás leis internacionais, é o que preocupa a Ban Ki Moon, que lembrou que, a non ser que se cumpran as súas esixencias, ningún dos membros da súa organización vai facer parte de ningunha das actividades por ela desenvolvidas.