Vieiros

O curso, inaugurado este mércores 11 polo secretario xeral de Comunicación, Fernando Salgado, e o decano da facultade, Miguel Túñez, aborda cuestións como a comunicación interactiva, a cibercultura, dereitos emerxentes, modelos de negocio, converxencia hipermedia e identidade. Este curso de verán, que organizaron os profesores Xosé Soengas e Francisco Campos, ten a particularidade de ser integramente difundido pola rede a través do mundo virtual Second Life e para telefonía móbil 3G.

Como convertérmonos en alumnado virtual? Debemos atopar a illa 'Uvvy2' e teletransportármonos a ela. No edificio da 'UniversidadSL', petamos na porta para que se abra e dentro del, cruzamos o patio e chegar ata o salón de actos.

Os relatorios axudarán a abordar a problemática da converxencia dixital dende unha tripla dimensión: a tecnolóxica, a económica e a social, a través dos soportes e modelos que propician as novas formas de comunicación relacionadas cos cibermedios, comunicación móbil e interactividade, radio e televisión por internet, Web 2.0 e 3.0, creación virtual e 3D. Sete conferencias e catro mesas de debate terán lugar ao longo dos próximos días: a televisión dixital terrestre en Galicia, a propiedade intelectual, ciberdereitos, canon dixital, cibermedios e participación social son algúns dos eixos temáticos. Faranse tamén obradoiros de creación e produción de contidos para a televisión e a radio a través de internet.