Vieiros

Aínda estades a tempo de participar en A polo ghit, pero tendes que bulir! Contamos cunha chea de versións: poemas das nosas autoras ("Son a suma total", ou a visión que Manoele ten de María Mariño, e o "Merengue Rosalía" da Charleston Big Band), "clásicos" da nosa música, como o "Xirarei" heavy de Machina, ou clasicos do punk, como a canción máis galega dos Clash traducida a bilingüe harmónico, na voz do Leo i Arremecághona!!! e os Puta Miseria.

Tampouco faltan temas orixinais, como "Ata a auga das macetas", un himno aos embebedamentos do verán, de Lulu. Imben pensa na xente para a que o verán significa suar o dobre traballando en "Ti tes vacacións?", e The Turre's Band propóñennos unha viaxe a Hawai. Taru e os paxaros de coiro fan unha reflexión Afrikannreggaefolk en "Babilonia".

Non faltan as cancións de amor (un dos temas estrela do verán), como "Rapariga", de Los Santos, ou "Bikos from Madeira", de Snatch, o existencialismo e o "tempus fugit" en "Eu non sei", de Sonhos, a festa na "Ramalleira", de Cuchufellos, ou xente con ganas de falar directamente "Da praia", como a Banda bahiana Gandanagaia. E Lamanaestrada propóñennos un "Tango para bailar em tanga"... Todos os estilos, temas e xéneros compiten por ser a canción do verán galega. Xa tendes o voso "ghit"?