Vieiros

Aínda que tivo preto do 45 por cento dos votos, o empresario e titular do partido de dereita Propuesta Republicana (PRO), Mauricio Macri, non acadou onte a maioría necesaria para converterse no novo alcalde da cidade de Bos Aires, polo que terá que enfrontarse co actual ministro de Educación do país, Daniel Filmus, que conta co apoio do goberno nacional. A segunda volta nesta elección será o vindeiro día 24 de xuño.

O líder do PRO e presidente do club de fútbol Boca Junior obtivo máis do 45 por cento dos votos nas eleccións para escoller alcalde e lexisladores (deputados da cidade), pero terá que enfrontarse co segundo na votación en 15 días.

Primeiras reaccións

"Tócanos gobernar dende o primeiro día preto dos veciños porque a política é a única ferramenta coa que se pode mellorar a vida de todos", adiantouse Macri, que é empresario e fillo do poderoso e polémico Franco Macri, titular dun imperio edificado grazas aos millonarios contratos co Estado que foi acadando sobre todo nos anos da última ditadura militar e co goberno do ex presidente Carlos Menem.

"Hoxe gañou o cambio -dixo Macri-. Agradezo tamén a aqueles que non nos votaron porque votando fixeron máis forte a nosa democracia", asegurou o empresario logo de que foran coñecidos os primeiros datos oficiais.

Pola súa banda, o ministro Filmus e candidato do presidente Néstor Kirchner asegurou que nas vindeiras tres semanas (até o 24 de xuño) "imos dar o debate para saber quen foi o que espallou a fame entre pobo, os que marxinaron, os que discriminaron", en relación ás relacións de Macri co ex presidente Menem.

Filmus engadiu: "Somos humildes, sabemos que aínda temos que traballar moito para ser mais plurais" e lembrou que ao seu carón estiveron e aínda están o mellor do socialismo, do radicalismo e dos sectores independentes".

Á espera dos resultados

Nas próximas tres semanas, tanto a dereita de Macri coma os peronistas e a esquerda que vai con Filmus loitarán por seducir aos votantes porteños. A elección na capital do país e unha loita na que o goberno nacional non quere perder terreo, xa que é a cidade máis importante do país e tamén a máis rica economicamente.

Ademais de ser a capital da Arxentina, a cidade de Bos Aires é -xunto ao primeiro cordón de cidades do Gran Bos Aires coas que mantén unha achega forte- a segunda urbe máis grande de Sudamérica e unha das maiores megalópoles do mundo. Ademais, Bos Aires é un dos principais centros culturais da América Latina e nela viven algo menos de 3 millóns de persoas. As eleccións de onte buscaban escoller ao vindeiro alcalde e á metade dos lexisladores da cidade e nelas podían votar 2.563.456 cidadáns.