Vieiros

"Estas prácticas recordan os métodos da Stasi", criticaba esta semana na prensa alemá o vicepresidente do Parlamento, o socialista Wolfgang Thierse, lembrando os procedementos da policía secreta da vella República Democrática de Alemaña.

O enfado de partidos e grupos en defensa dos dereitos civís vén pola toma de mostras de olor de activistas de colectivos críticos co cumio do G8, aos que as autoridades consideran potencialmente "perigosos". A práctica fana coa fin de adestrar os cans cos que vixiarán que os altermundistas non accedan á zona onde se reunirán os líderes mundiais. Tamén denuncian a construción dun valado arredor do recinto onde terá lugar a xuntanza, muro ao que varios políticos da oposición alemá cualifican de lembranza de "tempos pasados".