Vieiros

Profunda crise política e social en Filipinas, que este luns ten cita coas urnas. As eleccións non deixarán de ser tamén unha avaliación do labor da actual presidenta, Gloria Macapagal Arroyo. Acusacións de corrupción e sucesión de actos violentos foron a norma durante as últimas semanas, con máis dun cento de asasinatos, moitos deles de políticos.

Estes comicios deberán renovar a metade dos 24 asentos do Senado e os 250 escanos parlamentarios. Ademais, arredor de 85 mil candidatos preséntanse buscando algún dos 17 mil cargos públicos en xogo a nivel local. Nos últimos días houbo denuncias de fraude por parte de observadores que critican presión contra grupos da oposición. A coalición denominada Oposición Xenuína tratará de xuntar apoios suficientes para promover unha moción de censura contra a presidenta. Contra o intento xoga a convicción de que o líder na sombra é o ex presidente Joseph Estrada, no medio dun proceso xudicial por uso indebido de cartos públicos.