Vieiros

Un día despois do Día do Libro e uns meses despois de rematar o declarado Ano da Memoria, Editorial Galaxia presenta Os escritores galegos ante a guerra civil española. Nel, o catedrático de Literatura Galega Xesús Alonso Montero rescata textos inéditos de escritores galegos, onde se reflicte a súa posición ante o conflito bélico: Ramón Otero Pedrayo, Vicente Risco, Álvaro Cunqueiro, Ramón Cabanillas, Aquilino Iglesia Alvariño, Celso Emilio Ferreiro e Álvaro de las Casas manifestan por medio da súa obra a súa actitude ante a República, o Fronte Popular e a guerra civil, e como estes acontecementos marcaron a súa vida.

Pola súa banda, Xerais presenta Intelectuais marxistas e militantes comunistas en Galicia (1920-2006), onde Alonso xa centra a súa escrita nos intelectuais galegos que reflexionaron en Galicia dende o marxismo, algúns deles investigados por primeira vez. Fala dos homes e mulleres que tentaron cambiar a sociedade na que vivían, tanto antes como despois da guerra, dende postulados comunistas. Entre os moitos textos reveladores case descoñecidos, Alonso Montero introduce un documento inédito extraordinariamente significativo: a “acta” orixinal da primeira Asemblea de intelectuais do PCG, de marzo do 1977.

Alonso Montero, ademais de catedrático emérito na Universidade de Santiago de Compostela, é membro numerario da Real Academia Galega, director do Centro de Estudos Rosalianos e Presidente do Foro pola Memoria Republicana de Galicia. A el se lle debe un importante labor editorial, como produtor de antoloxías e colectáneas, ademais da autoría duns corenta libros. Ten analizado a nosa situación lingüística xa dende os 70 e escrito sobre Rosalía de Castro, Curros Enríquez, Leiras Pulpeiro, Castelao, Otero Pedrayo, Luís Seoane, Celso Emilio Ferreiro...