Vieiros

Iria Aboi, da Unión da Mocidade Galega, colectivo xuvenil da Unión do Pobo Galego, é desde este domingo a nova secretaria xeral de Galiza Nova. Para a nova dirixente, estas dúas xornadas de asemblea serviron para pór enriba da mesa as “nosas debilidades e potencialidades” nun exercicio rico e democrático que deu como resultado o reforzamento “da nosa unidade”.

Este domingo o acto de clausura da X Asemblea Nacional de Galiza Nova correu a cargo de Francisco Jorquera, quen salientou a necesidade de que o BNG non perda o "espírito xuvenil". Nesta liña, o coordinador da formación nacionalista asegurou que, coma sempre, esta nova dirección de Galiza Nova vai contar con todo o apoio da formación política, mais apelou á autonomía da organización xuvenil para que nun exercicio de madurez se "corrresponsabalicen" do seu traballo.