Vieiros

O máximo mandatario de Arteixo, Manuel Pose Miñones (PP), recoñeceu este martes que é accionista de dúas empresas relacionadas coa construción que traballan no municipio: Os Bosques S.L. e Os Boques 26-28, S.L. Un día antes, o xornal La Opinión aportaba datos da vinculación de Pose con eses negocios. De todos os xeitos, o alcalde asegura que está moi tranquilo porque non hai ningún comportamento irregular.

A oposición política non pensa o mesmo. Tanto nacionalistas coma socialistas coidan que é un “escándalo” e que esta duplicidade é a todas luces “inmoral”. As empresas do alcalde promoveron a construcción de edificios no centro da vila. A concelleira socialista Pilar Souto anunciou que o seu partido está a estudar accións legais.

Arteixo é un dos municipios con máis peso da área metropolitana coruñesa. Na actualidade conta con máis de 26.000 habitantes e dende hai anos experimenta un forte bum urbanístico debido a súa proximidade á cidade herculina. Pose Miñones goberna a localidade dende 1995. Nos comicios de maio de 2003 logrou 12 concelleiros para o PP, fronte aos cinco socialistas e catro nacionalistas. Aínda así, na actualidade goberna en minoría despois dunha escisión de edís nas súas propias filas.