Vieiros

Hoxe son xa máis de mil as persoas inscritas, 12.656 as novas aparecidas e máis de 217.000 os votos emitidos polos visitantes da web. Ese é o método polo que se decide que informacións pasan á portada de Chuza!: o voto, base do sistema de control editorial non xerárquico.

En 365 días de andaina, Chuza! converteuse tamén nun foro de opinión e discusión, pois acolleu 23.363 comentarios ás chuzadas -ou novas- procedentes de 3.033 fontes diferentes, entre medios de comunicación dixitais, blogs e portais de vídeo e imaxes. Das categorías das que consta, a que recibiu máis informacións foi política, con 1.251, seguida de denuncia, con 1.162, e rede, con 1.064.

Como mostra das preferencias dos usuarios da web, a historia que máis votos obtivo, 126, foi a do vídeo do alcalde de Ortigueira con Pocholo, seguida da opinión dos gaiteiros galegos sobre a interpretación flamenca do Himno (106), a portada de Interviú con Ana María Ríos (99) e as normas de cortesía do hotel Louxo (96).

A que deu pé a máis comentarios publicouse hai só uns días: a tentativa de fuxida de Ugio Caamanho, con 153 comentarios. O artífice de Chuza!, Berto Yáñez, anunciou que xa está a traballar nun redeseño do portal, que traerá consigo algunha que outra novidade. Mentres, os usuarios van deixando os seus parabéns na chuzada de aniversario.