Vieiros

O informe, aprobado polo pleno do Parlamento en Estrasburgo, avoga por evitar a acumulación de dereitos de uso de frecuencias, así como a formación de monopolios. "O escaseo de espectro radioeléctrico constituíu un obstáculo para o despregue dos novos servizos", por iso, o texto sinala a necesidade de adoptar un "enfoque sostíbel" que fomente a competencia e o desenvolvemento de tecnoloxías innovadoras.

No documento sublíñase a importancia de que a Unión Europea adopte unhas "directrices eficaces" para rematar coa diverxencia de asignación do espectro existente entre os distintos Estados membros, o que supón un "importante obstáculo para o bo funcionamento do mercado único". `

A distribución debe seguir criterios sociais, culturais e políticos
Ao mesmo tempo, destácase que a xestión deste espectro non debería centrarse só nos aspectos do mercado, senón que tamén debería ter en conta consideracións máis sociais, culturais e políticas. É por iso polo que, dado o escaseo do recurso "é necesario adxudicar un espectro suficiente para facer fronte ás necesidades dos consumidores e dos servizos de interese público e xeral, incluídos os servizos de radiodifusión".

Segundo o informe aprobado esta semana, no referido á xestión do espectro e na procura da innovación e do fomento da competencia, deben primar dous principios xerais: a neutralidade tecnolóxica e a neutralidade do servizo.