Vieiros

Coa aprobación dos dous proxectos como de "incidencia supramunicipal" cúmprese o primeiro trámite para a execución do proxecto. Será, a partir de agora, cando se inicie o seu desenvolvemento, e cada departamento da Administración emita os informes de viabilidade pertinentes.

Pérez Touriño destacou a importancia dos proxectos, que terán un investimento de 75 millóns de euros, e que, segundo os informes presentados por Stolt Sea Farm, prevén unha creación de 182 postos de traballo, que se suman aos 40 que xa xera a compañía na planta de Carnota. Neste sentido, Touriño subliñou as estimacións da produción, que "no caso de Carnota, serán de 1.700 toneladas de rodaballo e no de Porto do Son de 2.300 de linguado".

Parques empresariais e obras de saneamento
O presidente do Goberno puxo de manifesto a importancia dos acordos aprobados en relación a varios parques empresariais. Así, destacou o investimento que se vai realizar no das Gándaras, en Lugo, que contará cun orzamento de 75 millóns de euros, para un espazo de 2,2 millóns de metros cadrados; no de Baamonde-Begonte, con 20 millóns de euros, para unha superficie de máis dun millón de metros cadrados; e no de Landrove, en Viveiro, con 3,2 millóns para 130.000 metros cadrados. Ademais, autorizouse a aprobación definitiva do proxecto sectorial de incidencia supramunicipal da área loxística e intermodal do Porto Seco de Monforte de Lemos.

Tamén, foron aprobadas dúas partidas económicas para obras de saneamento en Fisterra e Arzúa, concretamente, 1.366.923,21 euros para unha estación depuradora de augas residuais na primeira, e 2.999.670,49, para colectores xerais e a estación depuradora de augas residuais na segunda.

Enerxía solar e incentivación da investigación
Na xuntanza deste xoves, o Consello da Xunta tamén aprobou a concesión dunha subvención de 5,84 millóns de euros ao proxecto de enerxía da compañía T-Solar. Esta empresa, de fabricación de paneis solares fotovoltaicos, implantarase no Parque Tecnolóxico de Ourense e prevé a creación de preto de 200 postos de traballo.

Por último, sacouse adiante un convenio de colaboración específico entre o Ministerio de Educación e as Consellerías de Educación e de Industria, para o desenvolvemento do Programa de incentivación da incorporación e intensificación da actividade investigadora.