Vieiros

Na súa comparecencia no Xulgado de instrución número 2 de Cangas, os demandados piden "a suspensión de todos os procesos penais abertos" contra eles. Presentan como avais todas as denuncias presentadas pola plataforma contra o porto deportivo do Salgueirón, e que seguen a ser obviadas. Tiago Pérez, voceiro da asociación, sinala que "xa hai sentenzas firmes ao noso favor". "Estásenos a xulgar por impedir de forma pacífica, -recalca-, o paso das máquinas e dos camións ás obras".

Cangas non se vende nace coa intención de se mobilizar "contra as agresións urbanísticas irreversíbeis propostas polo goberno municipal" en Cangas. Concretamente, "contra a Vía Rápida e o seu impacto visual, ecolóxico e social; o proxecto de urbanización de Massó, por constituír un grave atentado ecolóxico e contra o patrimonio social, histórico e identitario da vila; e contra o proxecto de urbanización de Aldán, polo seu impacto social, ecolóxico e visual".

Dende o Foro Social advirten: "Estamos nunha das derradeiras encrucilladas sobre futuro de Cangas; é a nosa responsabilidade impedir por todos os nosos medios que sepulten con cemento a nosa identidade, a nosa historia e o noso patrimonio social, cultural e ecolóxico".