Vieiros

Paul Auster fala dende o seu propio taller literario. "Un home, vello e só, está sentado nun cuarto no que hai unha ventá e unha porta, unha cama, un escritorio e unha cadeira. Non ten lembranzas. Tampouco sabe se pode saír ou non. Arredor, unhas fotos vagamente familiares, catro montóns de folios e unha serie de etiquetas con algunha palabra escrita a man".

A nova novela de Auster preséntase coma un auténtico acontecemento europeo: o autor reflexiona, dende a ficción narrativa, sobre as pantasmas da creación, mesmo incorporando ou rescatando ás veces personaxes doutras obras anteriores súas. Unha viaxe interior da que fai cómplice ao lector.

Paul Auster (Nova Jersey, 1947) e un dos máis prestixiosos escritores norteamericanos actuais: ten escrito ensaio, narrativa, guións de cinema (como os de Smoke, Blue in the face ou Lulu on the bridge) e algúns títulos de poesía, sobre todo na súa primeira época. Foi un dos principais tradutores de literatura francesa nos EUA, e no 87 entrou nos circuítos da literatura internacional coa súa obra The New York Trilogy. Tamén son célebres as novelas Moon Palace, Mr Vertigo, Leviathan, Book of Illusions e Oracle Night.

As mellores novelas da actualidade en galego
Editorial Galaxia continúa coa súa liña de grandes títulos da literatura universal contemporánea en lingua galega. No marco da iniciativa Biblioteca Compostela, realizada co apoio da Concellaría de Cultura de Santiago de Compostela, distribuíron hai pouco A casa dos encontros, de Martin Amis, A Pensión Eva, de Andrea Camilleri, e A medición do mundo, do alemán Daniel Kelhmann. Para os próximos meses poderemos ler tamén O retorno, de Bernhard Schlink, Fuxir, de Jean-Philippe Toussaint, e Camposanto de W. G. Sebald.