Vieiros

"A Academia de Dijon puxera a cuestión sobre a mesa en 1754, e Jean Jacques Rousseau escribiu en Sobre a orixe da desigualdade entre os homes que a orixe está na propiedade privada, na apropiación privada da riqueza do mundo." Miles de millóns de persoas sobreviven con menos dun dólar ao día, e a metade da poboación mundial, con dous. Hai 2.800 millóns de pobres en todo o mundo, 1.300 millóns na miseria. Non é algo exclusivo dos países do Sur: en Alemaña, un dos países máis ricos, o número de pobres chega ao 13,5 % da poboación.

"A medición da desigualdade social mundial nunca foi un tema prioritario para o Banco Mundial e o FMI. Si para as Nacións Unidas. No seu Informe sobre o Desenvolvemento Social Mundial do 2005, o Banco Mundial considera que a crecente desigualdade económica entre as distintas rexións do mundo e dentro dos países, é causa decisiva da violencia e do perigo de guerra (civil), e dubida que sexa posíbel achegarse e menos aínda acadar o obxectivo proposto pola Conferencia Mundial de Copenhague de 1995: reducir á metade a pobreza mundial". Mais o primeiro dos Obxectivos do Milenio estaría en vías de ser acadado de funcionaren vías alternativas de financiamento, como o microcrédito.

Pero distribuición da riqueza aínda é máis desigual cá dos ingresos: non se pode ter unha idea da desigualdade económica real sen aanlizar os dous parámetros por xunto: no estudo do WIDER abórdase a distribución global da riqueza na poboación adulta en función do ingreso familiar neto. Só se puido contar con estatísticas complexas de dezaoito países, e houbo que realizar enquisas, co problema que isto carrexa: as débedas e o patrimonio financeiro (particularmente inmobiliario) non se recollen axeitadamente.

O 90 % da riqueza mundial (ingreso familiar neto) está concentrado en Norteamérica, Europa e na rexión pacífico-asiática (O Xapón e Australia). Norteamérica, cun 6 % da poboación adulta do mundo, dispón dun terzo do ingreso mundial; á India, cun 15% da poboación do mundo, apenas un 1%. Pero tamén no Norte hai diferenzas: non é o mesmo o ingreso en Irlanda ca en Suíza ou nos EUA.

Os ricos máis ricos teñen unha fortuna superior aos 500.000 dólares (falamos de 37 millóns de persoas adultas), e esa cifra ten xa aumentado dende o 2000. Ou o que é o mesmo, corenta veces máis ca o cidadán promedio do mundo. O 85% da riqueza está nas mans desa elite, o 10% da poboación mundial. É máis: a metade das riquezas do mundo son propiedade do 2% das persoas que o habitan.