Vieiros

Mentres os operarios do recinto falaban dunha posíbel creba económica, Maril subliñaba esta semana que a Semana Verde non ten débedas. Dende a Xunta pensan de maneira totalmente distinta. Se ben Maril foi a "alma mater" do proxecto durante moitos anos, os dous partidos saben que dende hai tempo é un atranco máis. Unha fonte do goberno consultada por este xornal sinala que a débeda non só existe senón que é desorbitada. De feito, tanto socialistas como nacionalistas saben que o futuro a curto prazo do recinto pasa por un plan de saneamento. Se no ano 2000 o défice recoñecido chegaba aos tres millóns de euros, o bipartito coida que a débeda real é moito maior.

Un dos departamentos máis belixerantes é o de Medio Rural. A consellaría coida que é preciso un cambio radical na orientación da Semana Verde. Os de Suárez Canal queren que o recinto sirva de escaparate dos produtos galegos cara o exterior e non como na actualidade, onde moitas veces as empresas estranxeiras aproveitan as instalacións para dárense a coñecer aquí. Polo de agora, Medio Rural aposta pola Lonxa Agropecuaria e limitouse a apoiar a última feira da Semana Verde con algo máis de 102.000 euros. Hai que lembrar, pola contra, que na década dos 90 a Xunta destinábase unha media de 1,3 millóns de euros á promoción e organización deste evento.