Vieiros

Logo de que as súas 'caricias' na praia percorresen todo o mundo a través de YouTube e portais similares, a parella formada por Daniella Cicarrelli e Renato Malzoni decidiu demandar a varias páxinas web reclamando unha indemnización económica así como a retirada do contido ao consideralo privado. A xustiza brasileira aceptou a reclamación e pediulle aos portais a que eliminasen o vídeo. Porén, YouTube non acatou a orde polo que finalmente o xuíz acordou un bloqueo para que cumpra coa resolución.

Segundo o avogado da parella, o bloqueo de Youtube é tecnicamente posíbel e será cumprido pola empresas brasileiras que lle subministran a conexión internacional de internet ao país: "Non será YouTube quen suspenda as súas actividades para Brasil, senón que serán as empresas que ofrecen ese acceso as que deberán filtrar o tráfico para evitar que os brasileiros poidan acceder ao portal de vídeos".

Aínda así, segundo as declaracións dun membro do Ministerio Público que recolle o xornal O Estado de Sao Paulo, a clausura de YouTube "sería impracticábel", debido á dificultade técnica de bloquear o acceso dos internautas brasileiros ao sitio.